咁都得?兩大球王鬥囍!

作者:Angle    發表日期:2017-06-30 19:02:02

一個結婚、一個生仔,2大球王鬥幸福!美斯同C朗拿度球場上鬥餐死,近日更齊齊步入人生新階段,阿根廷球王美斯喺周五迎娶多年女友洛古絲素,同時正式就續約問題向巴塞隆拿講「我願意」,可謂雙喜臨門;C朗拿度雖然失落洲際國家盃,但尋日IG首度公開龍鳳胎照片,慈父Look半日喪吸近600萬Like破曬紀錄,Sweet到爆!

阿根廷時間星期五,美斯喺家鄉羅薩里奧迎娶女友洛古絲素,布斯基斯、佩奧爾、沙維、伊度奧、佐迪艾巴、法比加斯、蘇亞雷斯、阿古路等星級嘉賓齊齊出席,據報同一時間一度有12架私人飛機要求降落羅薩里奧。今次婚禮喺市中心廣場舉行,5星級酒店當然唔少得,最特別係酒店隔離就係賭場,賓客門出席完婚禮仲可以賭番兩手添。

新娘子洛古絲素同美斯識於微時,9歲已經開始拍拖,而且喺2012年同2015年分別誕下Thiago同Mateo兩個囝囝,組成幸福家庭。美斯喺婚禮講「我願意」之餘,西班牙《每日體育報》亦以頭版報道,美斯已答應同巴塞隆拿續約到2021年,年薪會有2,000萬歐元大幅增加至3,000萬歐元以上!考慮到美斯已經30歲,呢份好可能會係佢職業生涯最後一份重大合約,報道仲講埋7月15號正式進行簽約儀式,巴塞隆拿13號會展開季前集訓。

至於葡萄牙球星C朗拿度,雖然喺洲際盃4強出局,不過一雙龍鳳胎在懷,咩冠軍都比唔上啦!C朗尋日喺社交網貼相,首度公開傳聞中由代母所生嘅一對龍鳳胎,相中C朗一手一個BB,一個着住粉紅裕仔,一個着藍白套裝,C朗望住佢哋個樣勁慈父,相片貼出半日即獲600萬個Like,要知道2016年IG嘅全球最多Like相片都係得590萬咋!

C朗留言表示:「抱住呢對初生寶貝,我真係好開心。」葡萄牙傳媒早前透露,龍鳳胎囡囡叫Eva、囝囝就同美斯個仔一樣叫做Mateo,唔少網民更抵死表示,連埋7歲大仔「小C朗」在內,C朗依家有3個寶貝,成功以3比2反勝得兩個囝囝嘅美斯喎!

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170630/bkn-20170630184835464-0630_00882_001.html




Tag:
本文鏈接:http://www.solarmodulecell.com/17176.html